Nesten 15 000 søkarar har i år OsloMet som førsteval. Det er ein oppgang på opp mot 1 000 førstevalsøkarar samanlikna med 2025.
– Vi er glade for at stadig fleire vel høgare utdanning ved OsloMet, særleg utdanningar innan helse- og sosialfag og teknologi, og at tala på lærar- og barnehagelærarutdanningane aukar litt. Dette er område der det vil vere stort behov for kompetanse framover, og søkartala tyder på at mange unge gjer bevisste val med tanke på arbeidslivet, seier prorektor for utdanning, Silje Fekjær.
Sjukepleie er framleis studieprogrammet med flest søkarar, og i år har 1 875 dette som sitt førsteval.
På andreplass kjem bachelor i økonomi og administrasjon, med 1 204 førstevalssøkarar.
Blant studia som aukar mest samanlikna med i fjor, er bachelorstudiet i arkivvitskap, som har ein søkarvekst på 53 prosent. Også årsstudiet i dokumentasjonsforvaltning aukar, og har no meir enn 400 førstevalssøkarar.
Fleire vil ta helseutdanning
Årets tal viser at mange søker seg til studium innan helse, og fleire av helseutdanningane ved OsloMet har auka i popularitet i år.
Både bioingeniør, fysioterapi og vernepleie har hatt ein solid oppgang, medan andre helsefag som paramedisin og farmasi har stabile, høge søkartal.
Også dei sosialfaglege utdanningane barnevern og sosialt arbeid har mange søkarar.
Auke på byggingeniør
Blant ingeniørfaga er byggingeniør mest populær i år. Den relativt nye elektroingeniørutdanninga i automatisering og robotikk har også gode søkartal.
Anvend datateknologi held fram med å ha høge søkartal, medan noko færre vil bli dataingeniør.
Forkurs- og treterminordningane til ingeniørutdanningane, som begge rettar seg mot søkarar som manglar eitt eller fleire realfag, aukar med meir enn ti prosent. Totalt har nesten 1 800 søkarar anten tretermin eller forkurs som sitt førsteval.
Prorektor Silje Fekjær er glad for at stadig fleire vel høgare utdanning ved OsloMet. – Søkartala tyder på at mange unge gjer bevisste val med tanke på arbeidslivet, seier ho. Foto: Sonja Balci / OsloMet
– Det er positivt at så mange ønsker å kvalifisere seg til tekniske utdanningar. Samfunnet har stort behov for meir realfagskompetanse, og spesialtilboda til dei som manglar nokre fag for å kome inn på ingeniørstudium, er i tråd med regjeringa si realfagssatsing. Samtidig må vi jobbe for at fleire skuleelevar opplever meistring i matematikk, dersom vi skal sikre nok realfagskompetanse i åra som kjem, seier prorektor for utdanning, Silje Fekjær.
Forsiktig oppgang på lærarutdanningane
Grunnskulelærarutdanningane held fram den forsiktige oppgangen frå i fjor, med auke både i grunnskulelærarutdanninga for 5.–10. trinn og i lærarutdanningane i praktiske og estetiske fag.
Søkartala til barnehagelærarutdanningane er stabile.
Fleire av yrkesfaglærarutdanningane har i år ein god auke i søkartala.
– Med den aukande populariteten til yrkesfag i vidaregåande skule er vi glade for å kunne bidra til å utdanne fleire kvalifiserte yrkesfaglærarar. Vi veit at gode lærarar med pedagogisk kompetanse er viktige for kvaliteten i skulen, seier Fekjær.
Rekordmange søkarar frå Oslo og Akershus
OsloMet held fram med å trekke til seg mange søkarar frå storbyregionen. I år er det rekordmange søkarar frå Oslo og Akershus, og andelen søkarar frå regionen har vakse med 6,5 prosent.
– OsloMet ønsker å vere eit universitet for heile storbyregionen, og vi set pris på at vi rekrutterer frå alle delar av byen og dei ulike kommunane i Akershus, seier Fekjær.
Universitetet sine utdanningar på Kjeller har ein søknadsvekst på 13 prosent samanlikna med i fjor, og meir enn 1 800 søkarar har no studiestaden som sitt førsteval.
Stor søknad til masterutdanningar
Søkinga til masterstudia ved OsloMet held fram med å auke, og i år er det 9 900 som har søkt master ved universitetet.
Aller flest søker seg til masterstudium i økonomi og administrasjon og til helseutdanningar som helsesjukepleiar og jordmor, men også anvende IT-studium i cybersikkerheit og kunstig intelligens er svært populære.
Topp ti – bachelor og årsstudium, tal på førstevalssøkarar
Sjukepleie, Oslo – 1 219
Økonomi og administrasjon – 1 204
Fysioterapi – 883
Sosialt arbeid – 835
Administrasjon og leiing i offentleg verksemd – 655
Barnevern – 562
Anvend datateknologi – 509
Paramedisin – 486
Vernepleie – 421
Dokumentasjonsforvaltning, deltid, årsstudium – 410
Topp ti – bachelor og årsstudium, førstevalssøkarar per studieplass
Medium og kommunikasjon, årsstudium – 10,1
Økonomi og leiing, årsstudium – 8,7
Dokumentasjonsforvaltning, årsstudium, deltid – 8,2
Paramedisin – 8,1
Radiografi – 7,5
Kunst og design – mote og produksjon – 7,3
Fotojournalistikk – 6,2
Sjukepleie, deltid – 5,3
Bibliotek- og informasjonsvitskap, årsstudium – 4,8
Informasjonsteknologi, årsstudium – 4,6
Topp ti – master, tal på førstevalssøkarar
Økonomi og administrasjon (siviløkonom) – 794
Helsesjukepleie – 581
Revisor (siviløkonom) – 425
Jordmorfag – 383
Anestesisjukepleie – 374
Offentleg administrasjon og styring – 371
Cybersikkerheit – 362
Styring og leiing – 359
Familieterapi, deltid – 334
Anvend kunstig intelligens – 291
Topp ti – master, førstevalssøkarar per studieplass
Revisor (siviløkonom) – 15,8
Cybersikkerheit – 12
Økonomi og administrasjon (siviløkonom) – 12
Medieutvikling – medium og kommunikasjon, heiltid – 11,4
Familieterapi, deltid – 11,1
Anvend kunstig intelligens – 9,7
Anestesisjukepleie – 8,7
Farmasi – 8,4
Internasjonal utvikling, utdanning og berekraft – 8,4
Helsesjukepleie – 8,3
