For å motverke klimaendringane må aktørar på alle styringsnivå bidra i arbeidet med å kutte utslepp. Men korleis står det eigentleg til med klimaplanlegginga i norske kommunar?
Norske kommunar kontrollerer sektorar som er viktige for å redusere klimagassutslepp, sånn som arealplanlegging, avfallshandtering og trafikkontroll. I tillegg er dei pålagde å planlegge for reduksjon av utslepp gjennom statlege planretningslinjer.
I praksis har nesten alle kommunar ein dedikert klimaplan og/eller klimaplanlegging inkorporert i den generelle kommuneplanen (Kommuneplanens samfunnsdeldel). Det er i desse dokumenta at kommunane beskriv klimatiltaka sine. Det er likevel stor variasjon i korleis denne klimaplanlegginga ser ut frå kommune til kommune.
Ved hjelp av ulike metodiske tilnærmingar utforskar dette doktorgradsprosjektet klimaplanane til kommunane – kva dei inneheld, kva kommunekarakteristikkar som er knytte til ambisiøse planar og korleis desse planane blir implementerte.