Dette er første gong OsloMet og alle bydelane går saman om ein felles modell som koplar arbeid, utdanning og profesjonsutvikling saman. Piloten startar hausten 2026, med mål om å utvide ordninga fram til 2030. Studentane får verdifull arbeidserfaring tidleg. Barnehagane får fleire hender og ny kompetanse.
– Vi treng trygge og gode barnehagar med nok tilsette. I dag tar Oslo kommune og OsloMet eit viktig, felles krafttak for å styrke rekrutteringa – og samtidig gjere utdanninga endå meir relevant for jobben i barnehagen, seier byråd for utdanning i Oslo kommune, Julie Remen Midtgarden (H).
Den nye samarbeidsmodellen skal sikre betre rekruttering til barnehagane og samtidig gi studentane meir erfaring.
– Om lag 50 barnehagelærarstudentar skal jobbe deltid i Oslos kommunale barnehagar ved sida av studia. Det er bra for studentane. Det er bra for barna. Og det er eit heilt konkret grep for å møte utfordringar med rekruttering til barnehagelærarutdanninga og av tilsette til barnehagane våre, fortset ho.
– Auka rekruttering til barnehagelærarutdanninga og til barnehagelæraryrket er eit felles mål for OsloMet og Oslo kommune. Vi håpar tiltaket der studentar kan jobbe i barnehagane vil gjere barnehagelærarutdanninga endå meir attraktiv og relevant, seier Christen Krogh, rektor ved OsloMet.
Tilbod til tredjeårsstudentar
Gjennom den nye ordninga får barnehagelærarstudentane på sitt tredje og siste studieår ved heiltidsutdanninga ved OsloMet tilbod om betalte stillingar på 20 prosent i kommunale barnehagar. Dei vil jobbe fast i same barnehage ein dag i veka. Studentane søker sjølv i den bydelen dei ønsker å jobbe i, når stillingane blir lyste ut våren 2026. Bydelane melder sjølv interesse dersom dei ønsker å delta i piloten.
Arbeidet i barnehagane kjem i tillegg til den obligatoriske undervisninga og praksisen til studentane. Studentane som deltar i ordninga, vil få éin undervisningsfri dag i veka for å kunne jobbe i ein Oslo-barnehage.
– Fleire barnehagelærarstudentar får høve til å jobbe éin dag i barnehagen samtidig som dei utdannar seg. Dette kan bidra til ein betre overgang frå utdanning til yrke, seier Krogh.
Kjem barna, barnehagane og studentane til gode
Til grunn for ordninga ligg øyremerkte midlar frå regjeringa til toppa bemanning i barnehagane i kommunane, løyvde i revidert nasjonalbudsjett 2025. Studentstillinga kjem i tillegg til ordinær grunnbemanning i barnehagen. Det betyr at studentane ikkje inngår i berekninga av bemannings- eller pedagognorm, men skal vere eit ekstra ressursbidrag på toppen.
– Regjeringa har vore tydeleg på at dei ekstra midlane skal gå til betre bemanning i barnehagane. Oslo kommune viser korleis dette kan gjerast i praksis. Når pengane både styrker bemanninga og gir barnehagelærarstudentar høve til å kombinere studium med relevant praksis, kjem det både barna, barnehagane og studentane til gode, seier kunnskapsminister Kari Nessa Nordtun (Ap).
– Vil bidra til utvikling av barnehagelærarutdanninga
– Vi er veldig glade for denne ordninga der barnehagelærarstudentar får høve til å jobbe éin dag i barnehagen som ein del av heiltidsutdanninga si. Dette gjer at studentane får forsterka den faglege utviklinga si, seier Kristin Danielsen Wolf, instituttleiar ved Institutt for barnehagelærarutdanning.
– Studentane som deltar i ordninga vil få viktige erfaringar frå arbeid i barnehagen. Desse erfaringane kan igjen bidra til utvikling av barnehagelærarutdanninga. Slik vil samanhengen mellom undervisninga og praksisstudiet i barnehagen bli ytterlegare styrkt.
På biletet: Julie Remen Midtgarden, byråd for utdanning i Oslo kommune, Christen Krogh, rektor ved OsloMet og Kristin Danielsen Wolf, instituttleiar ved Institutt for barnehagelærerutdanning ved OsloMet.
