Mange som står utanfor arbeidslivet, har helseproblem som ikkje nødvendigvis hindrar dei i å jobbe. Under Arendalsveka var panelet samstemt: Helsetenesta har eit stort, uutnytta potensial til å bidra til arbeidsinkludering – og dette bør vere ein del av samfunnsoppdraget.
Bekeng påpeika at helsetenesta tradisjonelt har hatt eit binært syn: Enten er du frisk og kan jobbe, eller så er du sjuk og står utanfor. Han etterlyste betre samarbeid for å legge til rette for blant anna kronikarar, som er midt imellom.
– Å sørge for at arbeidsmarknaden har plass til den gruppa, må helsetenesta og arbeidsmyndigheitene samarbeide om, meinte han.
Gismervik trekte fram at arbeidsinkludering må vere ein del av diskusjonen når helsetenester blir planlagde.
– Det er eit stort potensial for synergi, sa Gismervik
Barrierar som bremsar
Begge peika på hindringar som manglande samhandling mellom helsetenesta og Nav, siloorganisering og budsjettskilje, personellmangel og vanskeleg tilgang til registerdata for forsking.
Eit eksempel på nye løysingar er «Prosjekt X» i Vestfold, der pasientar får éin veg inn til vurdering og tidleg avklaring av både helsemessige og arbeidsretta behov.
– Tidleg avklaring er undervurdert i norsk helseteneste, sa Bekeng.
Les meir om «Prosjekt X» på regjeringens nettsider.
Programleder for KAI-podden og forskningsleder ved AFI, Talieh Sadeghi, statsekretær Karl Kristian Bekeng og førsteamanuensis ved NTNU, Sigmund Østgård Gismervik. Foto: Kristine Welde Tranås / OsloMet
Helseteknologi kan bidra til arbeidsinkludering
Helseteknologi blir sett på som ein mogleg faktor for å bidra til arbeidsinkludering dersom han blir utvikla til å støtte tilsette, effektivisere arbeid og frigjere kapasitet. Samtidig inneber den ein risiko for negative effektar som er dokumenterte av forsking.
– Låg brukarvennlegheit kan føre til utbrentheit hos tilsette, meiner Gismervik.
Bekeng er skeptisk til å sjå teknologi som hovudløysing.
– Arbeidsretta rehabilitering krev tett menneskeleg oppfølging. Appar aleine løyser ikkje det.
Auka behov for helsepersonell i framtida
Behovet for tilsette i helse- og omsorgssektoren aukar. Rekruttering av unge uføre inn i helsetenesta sest på som ei mogleg dobbeltløysing – både arbeidsinkludering og auka bemanning.
Heile debatten kan du høyre i ei spesialutgåve av KAI-podden som snart blir publisert.
