Den nye perioden med gjensidig, likeverdig og utforskande samarbeid mellom skolar og OsloMet skal vare fram til 2030. Oppstarten blei markert med eit kickoff-seminar ved OsloMet, der representantar frå dei ulike skolane og fleire tilsette frå Institutt for grunnskole- og faglærarutdanning var samla.
Samarbeidet dreier seg om praksis, forsking og utvikling og skolebasert pedagogisk rettleiarutdanning.
Kompetanseheving til heile personalet
Nytt i denne perioden er at alle lærarar ved universitetsskolane får høve til å ta ei skolebasert pedagogisk rettleiarutdanning. Formålet er å styrke kvaliteten på rettleiinga av studentar i praksis, utvikle profesjonsfellesskapet på skolen, og bidra til å behalde nyutdanna lærarar i yrket.
– Når skolar og universitet møtest i likeverdig samarbeid, skaper vi rom for læring, seier leiar for ordninga, Janne Herseth.
– Gjennom felles forsking og utvikling av praksis skaper vi ny kunnskap som styrker lærarutdanninga og gir skolen eit solid fundament for framtida. Eg gleder meg til å arbeide i dette fellesskapet med å dele kunnskap, utforske nye idear og bygge framtidas skole!
Les meir om universitetsskoleordninga og sjå kva skolar som er med.
