– Ved Fakultet for samfunnsvitskap har vi allereie eit sterkt juridisk fagmiljø, særleg innan offentleg rett, som velferdsrett, men også innan rettsleg regulering av næringsverksemd og nyare teknologiar, som kunstig intelligens. Det gir oss eit særs godt utgangspunkt for å bygge ei rettsvitskapleg utdanning av høg kvalitet, seier dekan Oddgeir Osland.
Universitetsstyret godkjente 11. mars etableringssøknaden til fakultetet.
Ei naturleg fortsetting for OsloMet
Professor Julia Köhler-Olsen ved Institutt for sosialfag og professor Emily M. Weitzenböck ved Handelshøgskolen, OsloMet har hatt hovudansvaret for å utarbeide innhaldet og oppbygginga til studiet.
– OsloMet har ein lang tradisjon med profesjonsutdanningar, og rettsvitskap er ei naturleg fortsetting, seier Weitzenböck.
– Mange utdanningar ved OsloMet inkluderer allereie juridiske emne og krav til juridisk kompetanse, og universitetet har solid ekspertise innan ei rekke offentlege og privatrettslege fag og samfunnsrelevante tema, seier Köhler-Olsen.
Bachelorutdanninga vil dekke alle sentrale juridiske fag og gi studentane eit breitt fagleg grunnlag.
Dekan Oddgeir Osland. Foto: Sonja Balci / OsloMet
Viktig for Oslo
Köhler-Olsen meiner søkartala på landsbasis tilseier at det er rom for ei ny rettsvitskapleg bachelorutdanning.
– Det er eit ettertrakta studium og kandidatane er attraktive i det private og offentlege arbeidslivet.
Dekan Osland understrekar betydninga av å auke tilgangen på gratis rettsvitskapleg utdanning i Oslo.
– Det er viktig både for unge menneske som veks opp her og ønsker ei juss-utdanning, og for å møte behova til arbeidslivet i regionen.
– Vi ser at betydninga av rettsvitskapen i samfunnet aukar, og behovet for juridisk kompetanse i både forvaltning og næringsliv er stort, seier han.
Professor Julia Köhler-Olsen ved Institutt for sosialfag. Foto: Privat
Juridisk fagmiljø på tvers av institusjonar i Oslo
Köhler-Olsen og Weitzenböck framhevar også styrken i det etablerte juridiske nettverket i Oslo.
– Vi har allereie eit godt forskingssamarbeid med juristar ved både Det juridiske fakultet ved Universitetet i Oslo og ved Handelshøyskolen BI. Fleire gode fagmiljø vil berre berike det faglege juridiske fellesskapet, seier Weitzenböck.
Professor Emily M. Weitzenböck ved Handelshøgskolen, OsloMet. Foto: Kristine Welde Tranås / OsloMet
Planlegg masterutdanning frå 2030
Etableringa av bachelorutdanninga er første steg i prosessen mot ei femårig profesjonsutdanning. Eit masterstudium må akkrediterast av Nokut (Nasjonalt organ for kvalitet i utdanninga), og arbeidet med søknaden er i gang.
– Vi planlegg oppstart av eit toårig masterstudium hausten 2030, slik at studentane som startar på bachelorgrada i 2027, kan få heile profesjonsutdanninga ved OsloMet, seier Osland.
