I løpet av 2026 vil OsloMet-huset i Lillestrøm opne som ein arena for samarbeid med regionen om rekruttering, forsking og kompetanseutvikling i åra fram til OsloMet sin nye Campus Romerike i Lillestrøm sentrum står klar. Universitetet jobbar no med å finne lokal på ca. 400 m2.
Romerike Sparebank løyverer inntil 17 millioner kroner fram til 2030, der to millionar blir utbetalt i samband med oppstarten i 2026.
– Eg vil rette ein stor takk til Romerike Sparebank som ønsker å bidra til at OsloMet kan drive fagleg verksemd i Lillestrøm sentrum i åra fram til ny campus Romerike er etablert, seier prorektor for samfunnsforbetringar og samarbeid, Carl Thodesen.
– Gjennom OsloMet-huset vil vi invitere kommunar, arbeids- og næringsliv, skolar og ungdomsmiljø på Romerike til dialog og samarbeid, med særleg vekt på rekruttering, forsking, innovasjon og kompetanseutvikling, seier Thodesen.
– Universitetet har god erfaring med eit OsloMet-hus på Holmlia, og vi vil dra nytte av denne ved etableringa av eit tilsvarande hus i Lillestrøm, seier han.
Banken er glad for å bidra til arbeid til gode for befolkninga i regionen.
– Etableringa av OsloMet-huset er Romerike Sparebank sin hittil største enkeltståande samarbeidsavtale. Etableringa har stor samfunnsverdi og treffer midt i kjernen i samfunnsoppdraget vårt. Romerike Sparebank ønsker å bidra til langsiktig kompetansebygging i regionen og sikre framtidig arbeidskraft innanfor helse, teknologi og leiing, seier administrerande banksjef Siri Berggreen.
Arbeid for fagleg innhald
Ei arbeidsgruppe ved OsloMet jobbar no med å planlegge oppstarten av OsloMet-huset, og professor Marit Haldar ved Fakultet for samfunnsvitskap er fagleg leiar for satsinga.
Aktiviteten i OsloMet-huset skal følge tre hovudspor:
- Rekruttering til høgre utdanning for auka sosial mobilitet og for å motverke utanforskap, spesielt frå grupper av befolkninga som i dag er underrepresentert i høgre utdanning. Etter modell frå OsloMet Holmlia der universitetet har aktivitet i eit bydelssentrum tett på tenestetilbod innanfor helse, oppvekst og næring, blant anna med studentar som aktive rollemodellar.
- Forskings- og innovasjonsprosjekt som møter sentrale utfordringar i regionen, særleg knytt til demografiske endringar og press på helse- og omsorgstenester.
- Tilbod om vidareutdanning for arbeidstakarar i regionen.
Marit Haldar har sjølv lang og god erfaring med å drive forskingsprosjekt saman med kommunar og bydelar.
Ho er allereie i dialog med fleire fagmiljø ved universitetet om aktivitet i OsloMet-huset i Lillestrøm.
– Vi ser mange moglheiter for prosjekt og aktivitetar som svarar på behov i regionen, og eg er glad for at så mange eg snakkar med er positive og ønsker å bidra, seier Haldar.
– Hvis det er nokon som har idear til faglege aktivitetar, er det berre å ta kontakt, held ho fram.
– For eksempel har vi eit godt samarbeid med Fakultet for helsevitskap om å legge ei vidareutdanning i ergoterapi i OsloMet-huset, og det kan også vere aktuelt med ei etterutdanning innanfor offentleg leiing. Vi har også god dialog med fagmiljøa på Kjeller om mogleg aktivitet i OsloMet-huset, seier ho.
Arbeidsgruppan jobbar også med å finne eigna lokale i Lillestrøm sentrum på ca. 400 m2, som inneheld mingleareal, to større samlingsrom og nokre mindre kontor/grupperom. Planen er å ha lokalet avklart innan hausten 2026.
