I tildelingane frå Noregs forskingsråd i år har OsloMet fått tilslag på 20 av søknadene sine. Samla innstilt beløp er på over 215 millionar kroner.
Fire av desse prosjekta står forskarar frå By- og regionforskingsinstituttet NIBR for.
To av prosjekta er tildelte i utlysinga «Samarbeidsprosjekt for å møte utfordringar i samfunn og næringsliv» og to er tildelte i utlysinga «Forskarprosjekt for fornying».
– Denne veka er det stor jubel både på instituttet og på universitetet, seier NIBRs instituttdirektør Geir Heierstad, som er særleg imponert over at instituttet har fått tilslag på nesten halvparten av søknadene sine i denne runden.
Og til dei forskarane som ikkje vann gjennom i denne runden lovar direktøren at det er meir kake igjen til neste år. Heierstad fortel at arbeidet med søknader er godt i gang for å rekke den neste fristen i Forskingsrådet, som for 2021 kjem allereie i februar.
OsloMet sin rektor Curt Rice er stolt av arbeidet som er lagt ned ved universitetet til årets søknadsrunde.
– Dette er storarta! Gratulerer så mykje til alle fagmiljøa og støtteapparatet rundt, seier rektor Curt Rice. Dette både motiverer og inspirerer oss alle i det viktige arbeidet me saman gjer for samfunnet, seier rektor vidare.
Kompetanse- og samarbeidsprosjekt
I prosjektet «Mind the gap: Bridging knowledge and decision-making across sectoral silos and levels of governance in ecosystem based management» skal prosjektleiar Marthe Indset og teamet hennar studere korleis økosystembaserte retningslinjer og avgjerdsprosessar kan oppnåast gjennom forbetra administrativ praksis og verktøy i konsekvensanalysar og økosystemrekneskapar og -budsjettering i ulike politisk-administrative miljø. Frå NIBR deltek også forskar Gro Sandkjær Hanssen i prosjektet.
I prosjektet «Replay or renew? Learning from 20+ years of Norwegian-Russian collaboration on health and social welfare in the Barents region (REI:BARENTS)» skal prosjektleiar Aadne Aasland og teamet hans studere effekten av grenseoverskridande samarbeid på helse og velferd mellom Noreg og Russland i Barentsregionen dei siste 20 åra. Prosjektleiar for dette prosjektet er forskar Aadne Aasland. Frå NIBR deltek også forskarane Jørn Holm-Hansen og Mikkel Berg-Nordlie i prosjektet.
Forskarprosjekt
I prosjektet «Emigration from today’s Norway: Who, why, and how does it shape Norwegian society?» skal prosjektleiar Marianne Tønnessen og teamet hennar sjå på utflytting frå Noreg og konsekvensane av dette. Frå NIBR deltek også forskarane Aadne Aasland, Anne Balke Staver, Knut Onsager og Tone Liodden i prosjektet.
I prosjektet «Regulating migration and membership through monetary requirements» skal prosjektleiar Anne Balke Staver og teamet hennar sjå nærare på korleis tid og pengar påverkar innvandring og integrering i Noreg på ulike måtar. Frå NIBR deltek også forskarane Vilde Hernes, Mariann Stærkebye Leirvik og Tone Liodden i prosjektet.
