Mange vil seie at dette er ein rein fantasi, og at ein slik type direkte eller deltakande demokrati aldri kan fungere i store og komplekse samfunn som vårt eige. Dette synet er ikkje berre utbreidd i allmenta, men også djupt forankra i samfunnsvitskapane.
Men stemmer det?
Avgjerder i fellesskap
Eit nytt prosjekt ved By- og regionforskningsinstituttet NIBR og Handelshøyskolen på OsloMet skal likevel studere eksempel frå nær fortid der svært mange menneske har fått makt til å ta avgjerder i fellesskap, og dermed utfordra dette synet.
– Vi vil blant anna undersøke samanslutningar av jordbrukskollektiv i India, arbeidarstyrte bedriftskonglomerat i Spania, og digitale plattformer som engasjerer hundretusenvis av menneske i Taiwan eller Europa, seier Sveinung Legard ved NIBR.
Saman med Sissel Hovik frå Handelshøyskolen ved OsloMet skal han tråle internasjonale databasar som omtaler eksempel på innbyggarmedverknad i stor skala, for å undersøke kor godt desse fungerer.
Med støtte frå OsloMets satsing «Eit slitesterkt demokrati» har prosjektet fått 582 950 kroner, og skal gå frå august 2026 til juni 2027.
