Prosjektet tek utgangspunkt i Barnetråkk. Det er eit digitalt verktøy som samlar inn barn sine opplevingar og ønskje for nærmiljøet. Prosjektet har fått støtte frå OsloMet og varer ut 2025.
Målet er å utvikle KI-baserte metodar som kan analysere korleis desse innspela faktisk blir behandla i reguleringsplanar, og om dei får reell betydning for utbyggingane som følgjer.
– Vi ønskjer å utvikle verktøy som gjer det lettare for kommunane å kontrollere om interessene til barn og unge faktisk er ivaretekne i planforslag, seier prosjektleiar Sveinung Legard.
Han legg til:
– Det handlar om å gjere medverknad til meir enn berre ein formalitet. Barnetråkk kan gje verdifulle data, og vi ønskjer å sjå om dei kan bli brukte på ein måte som har innverknad.
Kommunane sine behov
Prosjektet skal samarbeide med Oslo og Lillestrøm, to av OsloMet sine universitetskommunar, for å teste metodane i praksis.
Gjennom kvalitative analysar, intervju med planleggjarar og læringsverkstader skal forskarane sikre at KI-modellane gir innsikt som stemmer med røyndomen i kommunane.
– Vi er opptekne av å finne ut kva behov kommunane har og ikkje har for å ta i bruk ny teknologi for å vurdere plansaker, seier Legard.
– Difor er dialogen med kommunane heilt sentral i prosjektet.
På sikt håpar forskarane å utvide prosjektet til fleire kommunar og landsdelar, og planlegg å søkje midlar frå Forskingsrådet sitt program «Areal under press».
Prosjektteamet har kompetanse innan både kartdataanalyse og maskinlæringsassistert tekstanalyse, og ser moglegheiter for å styrke demokratisk medverknad gjennom smart bruk av teknologi.
