Norfund er statens investeringsfond for utviklingsland, og har eit tydeleg mandat om å bidra til berekraftig utvikling.
– Likestilling er ein viktig del av dette, men det er ikkje alltid like enkelt å omsetje ambisjonar til praksis, seier prosjektleiar Marianne Millstein.
Prosjektet skal sjå nærare på korleis Norfund integrerer likestilling i det strategiske arbeidet sitt, og i konkrete prosjekt. Det er finansiert av Utanriksdepartementet og varer til november 2025.
Ved sida av å studere et utval av investeringar, skal forskarane og undersøkje erfaringar frå tilskotsordninga Business Support, med fokus på kapasitetsbygging i utvalde afrikanske land.
– Vi ønskjer å forstå korleis Norfund arbeider med likestilling i ulike kontekstar, og kva for verkemiddel som faktisk fungerer. Samstundes er vi opptekne av å identifisere barrierar og dilemma som kan oppstå, seier Millstein.
Lokal tilpassing er viktig
Likestilling er eit tverrgåande tema i norsk utviklingspolitikk, men i praksis må det ofte balanserast mot andre omsyn. Det kan vere omsyn som høg investeringsrisiko, lokale normer og behovet for langsiktig endring.
– Det finst ingen éin løysing som passar alle. Difor er det viktig å få innsikt i korleis Norfund tilpassar seg ulike lokale forhold, og korleis dei vurderer kva som er mogleg å oppnå på kort og lang sikt, forklarar Millstein.
Prosjektet kombinerer dokumentstudium med intervju av Norfund-tilsette, selskap og samarbeidspartnarar i felt. Funna skal òg diskuterast i lys av nyare forsking på ansvarleg næringsliv og investeringar i det globale sør, der likestilling er eit tema som får stadig meir merksemd.
– Vi håpar prosjektet kan bidra til å styrkje kunnskapsgrunnlaget for korleis likestilling kan fremjast gjennom investeringar, avsluttar Millstein.
