OsloMet har inngått ein leigeavtale om kontorplassar i lokala til Kunnskapsbyen Lillestrøm i Sørumsgata (kunnskapsbyen.no), som også gir tilgang til møteromsfasilitetar. Foreløpig er det OsloMet-tilsette som er involvert i Campus Romerike-prosjektet som har tilgang til plassane.
– Vi er glade for at vi framover kan jobbe tettare på samarbeidspartnarane våre i Kunnskapsbyen Lillestrøm, næringslivet og leiinga i kommunen, seier prorektor for samarbeid og samfunnsforbetring, Carl Thodesen.
– Med tanke på arbeidet med OsloMet sin framtidige campus Romerike i Lillestrøm sentrum er det heilt naturleg at vi blir ein tydelegare del av bybiletet, i tillegg til aktiviteten vår på campus Kjeller, seier Thodesen.
Felles satsing
Den siste tida har samarbeidet med regionen handla mykje om det politiske påverknadsarbeidet knytt til regjeringa si behandling av konseptvalutgreiinga for OsloMet sitt nye campus Romerike (rb.no).
– Vårt mål og ønske er ein ny campus i Lillestrøm sentrum som kan romme 4500-5000 studentar. Det vil sikre eit kraftfullt universitet i stand til å svare på regionen sine behov for kompetanse, seier rektor ved OsloMet, Christen Krogh.
– Vi er glade for støtta frå dei viktige næringsaktørane i regionen, og at Kunnskapsbyen Lillestrøm og medlemmane deira viser til OsloMet for å få nødvendig arbeidskraft og kompetanse til Romerike, som er landets raskast veksande region, seier Krogh.
Planlegg innovasjonsdistrikt
OsloMet har i lengre tid vore medlem av Kunnskapsbyen Lillestrøm, som er eit partnarskap mellom næringsliv, kunnskapsverksemder og kommunar på Romerike. Kunnskapsbyen bygger bruer og skapar nettverk på tvers for å skape innovasjonar i regionen som vil sikre etablering og utvikling av næringsliv.
Eit av prosjekta Kunnskapsbyen jobbar med er utviklinga av eit nytt innovasjonsdistrikt på Romerike – Node 60.
Helse, energi og beredskap er sentrale satsningsområde for innovasjonsdistriktet, og OsloMet vil ha ei aktiv rolle i dette arbeidet.
