OsloMet og Sunnaas har over tid hatt eit tett samarbeid gjennom forsking og undervisning. No har prosjektet fått innovasjonsmidlar frå OsloMet, som ein del av det tematiske satsingsområdet "framtidas helse- og omsorgstenester", og skal med det takast til neste nivå.
Målet er ikkje berre betre hjelpemiddel, men kortare produksjonstid og meir tilpassa og målretta hjelpemiddel.
– Vi skal bringe kompetanse på teknologi inn i klinikken, der problemstillingane, pasientane og klinikarane er, fortel Morten Ødegård, senioringeniør ved OsloMet.
Kartlegging som fyrste steg
I denne piloten kartlegg OsloMet og Sunnaas korleis 3D-teknologi kan brukast til å løyse kliniske problemstillingar. Det inneber innkjøp av utstyr, kartlegging av regulatoriske krav, og strategisk forankring i institusjonen.
I løpet av 2026 skal det arrangerast workshopar med ergoterapeutar og pasientar, med fokus på makerspace og enkle hjelpemiddel. Meir avanserte hjelpemiddel, som individuelt tilpassa ortosar for hand og ankel, skal utforskast i piloten. Det vert enno ikkje testa på pasientar, men målet er at det vert gjort.
Sensorteknologi under utvikling
Sensorteknologi som kan måle rørsle, belastning og brukstid er ein del av det som skal utforskast, i dag først og fremst gjennom forsking og utdanning i studentprosjekt, i masteremne og masteroppgåver.
Målet på sikt er at slike data kan gje betre grunnlag for oppfølging, påminningar og visualisering av framgang.
Tett samarbeid mellom klinikarar og teknologar
Arbeidet vert gjort i tett samarbeid mellom klinikarar og teknologar. Slik kan idear og løysingar diskuterast og justerast undervegs.
– La oss seie at du skal spele kort, men slit med grepet i handa. Så kan ein sjå føre seg eit hjelpemiddel som gjer at du klarar å halde korta, eller kanskje eit objekt som du puttar ein penn eller blyant nedi, slik at du får eit betre grep.
Utdanning og forsking i same løp
OsloMet sin 3D lab og studentprosjekt er kopla tett på kliniske behov gjennom piloten. Studentane reiser ut til Sunnaas og presenterer løysingar for opp mot 40–50 klinikarar, seier Morten Ødegård.
Piloten kartlegg
- kva kliniske problemstillingar hos Sunnaas som eignar seg for 3D teknologi
- regulatoriske krav og kva som må vere på plass før pasienttesting kan starte
- utstyrsbehov og moglege arbeidsflytar
- innspel frå ergoterapeutar og pasientar gjennom workshopar
- grunnlag for å vurdere kostnader og moglegheit for skalering seinare
Arbeidet vert gjort i tett samarbeid mellom klinikarar frå Sunnaas og teknologar frå OsloMet. Foto: Privat
Vegen vidare
Neste steg er å summere opp funna frå kartlegginga og workshopane. Viser resultata at det er grunnlag for det, kan piloten gå vidare til testing med pasientar, og etter kvart takast i bruk i fleire rehabiliteringsmiljø.
Les meir på elektronikknett.no: Mer effektiv rehabiliteringsprosess med 3D-print og sensorteknologi
Biletet øvst i artikkelen viser senioringeniør Morten Ødegård og fag- og forskningsansvarlig ergoterapeut ved Sunnaas sykehus, Anne-Marthe Olsen Sanders.
