OsloMet inviterer i samarbeid med den nasjonale komiteen for berekraft i høgare utdanning til SDG (Sustainable Development Goals)-konferansen 2026: Education Unscripted – The Quest for Truth, Collaborative Transformation & Solidarity (uni.oslomet.no).
Temaet for konferansen er korleis utdanning, livslang læring og tettare samarbeid om å ta i bruk kunnskapen vi har, kan bidra til å møte vår tids store og samansette utfordringar som klimakrisa, desinformasjon, KI-kappløpet, autoritær politikk og globale ulikskapar.
Representantar frå universitet og høgskular vil saman med politikarar, forskarar, studentar, næringslivsleiarar og andre samfunnsaktørar diskutere:
- På kva måte kan vi utnytte den kunnskapen vi har på tvers av fagområde og sektorar, og samarbeide betre for å kunne nå FNs berekraftsmål (Sustainable Development Goals, SDGs) innan 2030?
- Korleis får vi dette til i ei verd der sosiale kontraktar vert ignorerte, og det demokratiske fundamentet i samfunnet er truga?
Prorektor for samfunnsforbetringar og samarbeid Carl Thodesen. Foto: Titt Melhuus / OsloMet
– SDG-konferansen er ein viktig arena som samlar aktørar frå heile landet og på tvers av sektorar for å snakke om utvikling for ei berekraftig framtid, seier prorektor for samfunnsforbetringar og samarbeid ved OsloMet, Carl Thodesen.
– Eg ser fram til å møte alle deltakarane i Oslo i februar, der vi skal tenke nytt om korleis vi innrettar utdanningssystemet og tilpassar måten vi samarbeider på i ei tid med fleire globale kriser, seier Thodesen.
Provokasjonar og håp i klimakrisa
Aina Landsverk Hagen, forskar ved Arbeidsforskningsinstituttet AFI ved OsloMet, leier programkomiteen for SDG-konferansen 2026. Forskarar, rådgivarar og studentrepresentantar frå heile landet har gjennom det siste året arbeidd fram eit program som tek for seg dei komplekse utfordringane universiteta har som ansvarlege for berekraft i høgare utdanning. Ho ser fram til å ønske velkomen til inspirerande, faglege diskusjonar og meiningsbryting.
– Vi gler oss til å ta imot både internasjonale og norske innleiarar på tvers av generasjonar, som alle har med seg verdifulle perspektiv på konferansen sitt hovudtema, utdanning og livslang læring i partnarskap, seier Landsverk Hagen.
Aina Landsverk Hagen leier programkomiteen for konferansen.
– Mellom anna kjem forskar Nadia Raphael Rathje, medgrunnleggjar og rektor ved Den Grønne Friskole i København, som vart etablert med ambisjonen om å utvikle pedagogiske og didaktiske tilnærmingar som støttar det grøne skiftet.
– Vi skal òg få høyre frå professor og klimaekspert Alasdair Skelton ved Stockholms universitet, som er forfattar av boka Our Time – Finding Hope in a Climate Crisis (2026).
Les meir om programmet og hovudtemaet på nettstaden til konferansen (uni.oslomet.no)
Måndag 2. februar finn konferansen sitt hovudprogram stad i Oslo rådhus, der internasjonale innleiarar bidreg med innsikt, provokasjonar og refleksjonar. Her vert alt frå keynotes til sofasamtalar strøyma gjennom dagen, og Hagen oppmodar universitet og høgskular til å arrangere lokal konferansestrøyming for studentane og dei tilsette.
Tysdag 3. februar vert det oppmoda til sjølvorganiserte arrangement over heile landet (ansatt.oslomet.no). Dei som oppheld seg i Oslo kan besøke konferansen sin hovudarena Deichman Bjørvika (deichman.no) for å delta i ei rekkje spanande diskusjonar, panel og debattar gjennom dagen .
Kontinuerleg arbeid
– Som universitet har vi eit ansvar for å bidra til å utvikle kunnskap og finne nye løysingar på dei store utfordringane vi står overfor, i tett samarbeid med styresmakter, arbeids- og næringsliv og internasjonale partnarar. Den årlege SDG-konferansen er ein del av dette arbeidet, seier Thodesen.
Då FNs 17 berekraftsmål vart vedtekne i 2015, vart universitet og høgskular tidleg identifiserte som nøkkelaktørar for å kunne nå måla, gjennom utdanning, forsking, formidling og innovasjon.
Norske universitet og høgskular samarbeider i ein nasjonal komité (nmbu.no), og den årlege SDG-konferansen vart etablert som ein sentral møteplass for å diskutere korleis sektoren kan styrkje rolla si i arbeidet med berekraftsmåla.
SDG-konferansen vart arrangert av Universitetet i Bergen frå 2018 til 2025. Les meir om tidlegare konferansetema (uib.no).
