Samarbeidet skal bidra til meiningsfulle samanhengar mellom utdanning, forsking og praksis. Det skal støtte opp om utviklingsarbeid, forsking og innovasjon som utviklar skole og lærarutdanning.
– Vi tenker at dette er endå ein milepæl i samarbeidet mellom Utdanningsetaten og fakultetet. Avtala understrekar at vi saman skal bidra til samfunnsforbetringar innan oppvekst og utdanning, sa dekan Roger André Federici.
Representantar frå Fakultetet for lærarutdanning og internasjonale studium og Utdanningsetaten i Oslo kommune var samla til avtalesignering. Dei hadde også faglege samtaler om kva kompetanse lærarar i Osloskolen treng i møte med ei mangfaldig elevgruppe, særleg i samband med lesing og skriving. Foto: Siv Tonje S. Håkensen / OsloMet
– Utdanningsetaten og OsloMet er lærerutdannere på ulike, men likeverdige læringsareaner. Vi har eit felles ansvar for at alle elevar, lærlingar og andre deltakarar møter kvalifiserte og trygge lærarar og leiarar, supplerte assisterande etatsdirektør i Utdanningsetaten Marianne Stenberg.
Samarbeid om utdanning, forsking og utvikling og etter- og vidareutdanning
Fakultetet har over lang tid samarbeidd tett med Utdanningsetaten om kvalitet i praksisopplæringa. Med den fornya samarbeidsavtala, blir samarbeidet utvida til fleire område.
Avtala består av tre innsatsområde:
- Utdanning: Samarbeidet skal styrke kvalitetssikringa av praksisopplæringa til studentane og gi fleire praksislærarar med rettleiingskompetanse. Det skal også bidra til rekruttering av studentar til lærarutdanningane og lærarar til Osloskolen. Partane skal dessutan samarbeide om studentane sine bachelor-, FoU- og masteroppgåver.
- Forsking- og utvikling (FoU): Partane skal samarbeide om FoU-prosjekt som vidareutviklar og kvalitetssikrar lærarutdanningane. Forskingsresultat skal bli tilbakeførte til Osloskolen.
- Etter- og vidareutdanning (EVU): Samarbeidet skal gi kompetanseutvikling for tilsette i Osloskolen og vitskapleg tilsette ved fakultetet. Formålet er skoleutvikling, gjensidig læring og vidareutvikling av lærarutdanningane.
På bildet øvst: Marianne Stenberg, assisterande etatsdirektør i Utdanningsetaten i Oslo kommune og Roger André Federici, dekan ved Fakultetet for lærarutdanning og internasjonale studium, signerer den nye avtala.
