Innovasjon Noregs program STUD-ENT skal stimulere til at kunnskap og kompetanse frå universiteta og høgskolane kjem ut i samfunnet, og at nye entreprenørskapsbedrifter blir etablerte. Årets tildeling blei offentleggjord rett før påske, og gav milliontilskot til 32 bedrifter, der altså fire stykke høyrer heime på OsloMet.
– Gir studentane høve til verdiskaping
Prorektor for samfunnsforbetringar og samarbeid – Carl Thodesen – er entusiastisk over dei gode resultata. Han er også imponert over breidda av idear, og korleis nye løysingar blir tatt i bruk for å løyse reelle problemstillingar i samfunnet.
Prorektor Carl Thodesen er imponert over breidda i prosjekta. Foto: Pål Kvalnes
– Desse tilskota er verdifulle fordi dei gir studentane våre høve til å skape verdi i samfunnet. Samtidig er dei også svært viktige som ei anerkjenning av arbeidet vi gjer ved OsloMet for å utvikle eit økosystem for innovasjon og entreprenørskap. Breidda i konsepta som har fått tilskot illustrerer kreativiteten til studentane våre når det gjeld å tenke entreprenørielt på tvers av mange sektorar, seier Thodesen.
Fjerner batteri frå avfall
For gründerane Hanna Lund, Thelma Annweiler og Siri Jenssen Stockfleth var det viktig at ideen dei utvikla hadde ein berekraftsdimensjon. Bedrifta deira, Arctech Robotics, utviklar ei løysing for å modernisere avfallssortering med avansert robotteknologi.
Løysinga vil gjere ettersorteringsanlegg verda over smartare og tryggare, ved å fjerne batteri frå avfallsstraumen. Dette reduserer brannrisikoen og aukar sorteringsgrada.
Arctech Robotics. Frå venstre: Hanna Lund, Siri Stockfleth og Thelma Annweiler Foto: Pål Kvalnes
– Berekraft var heilt sentralt for oss allereie frå idéfasen. Vi ville skape ei løysing som kunne bidra til auka sirkularitet i samfunnet, ikkje berre som ein visjon, men som eit konkret mål med målbare effektar. Løysinga vår gjer det enklare for avfallsanlegg å møte strenge EU-krav til materialgjenvinning, aukar sikkerheita på anlegga, og forbetrar lønnsemda i avfallshandtering, seier dei tre eigarane.
Bedrifta blei etablert våren 2024 av Lund, Annweiler og Stockfleth. Sidan har teamet vakse, og består no av studentar frå både OsloMet og NTNU. Løysinga skal etter planen testast i eit norsk anlegg denne hausten.
App skreddarsyr shopping
Kleda er kanskje den av studentbedriftene blant vinnarane i år som har komme lengst. Kleda er ei shoppingplattform som koplar forbrukarane direkte til influensarars garderobar, og som gjennom målretta og personlege oppfordringar hjelper brukarane til appen med å finne klede dei faktisk ønsker å behalde.
Også hos Kleda ligg tanken om berekraft i botn; målretta oppfordringar skal bidra til å redusere returar.
Tre månader etter at appen blei lansert, var Kleda lasta ned over 20 000 gonger på verdsbasis, og gründerane bak produktet har inngått avtaler med ei rekke klesbutikkar.
Christoffer Fagereng Jacobsen i Kleda. Foto: Pål Kvalnes
– Tildelinga av STUD-ENT betyr ikkje berre at vi kan vidareutvikle Kleda. Det gir oss også eit sterkt kvalitetsstempel når vi no går ut og hentar kapital. For oss er dette både ei bekrefting på potensialet i Kleda, og eit viktig steg på vegen mot å skalere plattforma vidare, seier dagleg leiar Matias Rædergård.
Brukar KI til vurdering av bilskadar
Tanken bak bedrifta AUTOLYZER har vore å utvikle ei KI-plattform, med digitale verktøy som er i stand til å vurdere bilskadar raskt og nøyaktig.
Ved å erstatte manuell synfaring – som kan variere frå person til person, og verkstad til verkstad – med ein automatisert prosess, kan ein eliminere subjektivitet i vurderinga av skadar på bilar. Det kan redusere risikoen for svindel og feilaktige kostnadsberekningar.
Løysinga vil også vere i stand til å estimere kostnaden for reparasjonar, noko som gjer heile prosessen rundt skadevurdering- og omfang raskare og meir transparent for kunden.
Det er Leila Mozaffari som står bak konseptet. Til forskjell frå resten av prosjektgruppene, som kjem frå masterstudiet i entreprenørskap, har Mozaffari bakgrunn frå masterstudiet i datavitskap ved Fakultetet for teknologi, kunst og design.
Leila Mozaffari står bak konseptet AUTOLYZER Foto: Pål Kvalnes
– Med min eigen bakgrunn, og gjennom samarbeid med ekspertar frå bransjen, har eg vore i stand til å utvikle AUTOLYZER frå eit teknologisk utgangspunkt til eit produkt. Men når det gjeld å utvikle løysinga frå idé til konkret produkt, har støtta frå universitetet vore avgjerande, seier Mozaffari.
Tildelinga frå STUD-ENT gjer at Mozaffari no kan vidareutvikle appen, og håpet er at løysinga skal brukartestast både ute i verkstad og hos forsikringsselskap i løpet av året.
Gjer alarmknappen på sjukehus digital
Dei fleste av oss har vore i kontakt med den klassiske alarmsnora på sjukehus. Kanskje har du vore i tvil om det er greitt å trekke i den eller ikkje. Kanskje har du vore i ein situasjon der du desperat ventar på respons etter at du har trekt i snora. Alarmsnora differensierer ikkje; den gir ingen valør til behovet.
Sjukehuspersonell møter utfordringa dagleg. Hedda Borge Svinø, masterstudent i entreprenørskap på OsloMet, har sjølv bakgrunn som sjukepleiar. Saman med Magnus Lønseth frå USN – som også har erfaring som helsearbeidar – har ho utvikla appen Pling som eit svar på behovet.
Hedda Borge Svinø står bak Pling, saman med Magnus Lønseth Foto: Pål Kvalnes
– Eg bruker så mykje tid på å gå opp og ned dei lange sjukehusgongene, fordi pasientar ringer på etter hjelp, og eg veit jo ikkje om pasientane har kraftige smerter eller om dei berre har lyst på ein kopp med kaffi, seier Borge Svinø.
– Denne arbeidsmåten gjer det vanskeleg å prioritere oppgåver og pasientar rett. All gåinga er også sløsing med verdifull tid, som kunne vore brukt på pasientpleie, seier Borge Svinø.
Appen Pling vil tilby ein ny måte for pasientar og personell å kommunisere på. I appen blir pasientar gitt tilgang til menyar, der dei kan velje mellom ulike kategoriar av behov.
Det pasienten oppgir av behov, blir sendt direkte til sjukepleiars smarttelefon. Sjukepleiar kan dermed betre prioritere mellom oppgåver og pasientar.
Stor del kvinnelege entreprenørar
Sju av dei ni gruppene frå OsloMet som søkte støtte gjennom STUD-ENT i år, blir leidde av kvinnelege studentar. Det same gjeld altså tre av dei fire som enda opp med støtte. Over tid har dette vore ein trend ved OsloMet, seier Carl Thodesen:
– Heile ni av tolv grupper med gjennomslag sidan 2016 har hatt kvinneleg prosjektleiar. Tildelingane i år viser igjen at OsloMet lykkast med noko fleire av dei andre universiteta slit med: å tiltrekke seg – og styrke – andelen kvinnelege entreprenørar. Og Innovasjon Noreg sjølv har ein ambisjon om at 40 prosent av gruppene som får støtte, skal vere leidde av kvinner. Så vi er i forkant, seier Thodesen.
Hjelp og rettleiing frå Gründergarasjen
Gründergarasjen har samarbeidd med OsloMet om innovasjon og entreprenørskapsaktivitet på campus sidan 2018, og studentinnovasjon har spelt ei viktig rolle frå starten.
Det gjer det også i prosessen rundt STUD-ENT, der inkubatoren har gitt rettleiing til studentane om korleis ein best pitcher ideane og konsepta sine til Innovasjon Noreg.
– Dei fleste selskapa kom til oss i Gründergarasjen etter at dei hadde sendt inn søknad og blitt inviterte til intervju. Vi jobba typisk med selskapa i eitt til tre møte, med fokus på å forbetre pitchen og forstå tilbakemeldingane frå Innovasjon Noreg, seier Emma Skattum i Gründergarasjen.
Dei studentbedriftene som har fått støtte, får dessutan tilbod om eit års plass i sjølve garasjen.
– I inkubatoren vil dei ta del i eit tilpassa program som gir bedriftene vidare rettleiing, nettverk og ressursar til å kunne skalere bedrifta si vidare, seier Skattum.
