Utgangspunktet for granskinga er opplysningar som har kome fram i andre land og opplysningar i media om svært alvorlege forhold i utanlandsadopsjonar frå enkeltland til Noreg.
– Granskinga blir omfattande og skal omhandle alle land som Noreg har hatt adopsjonssamarbeid med. Eg forventar at granskinga vil gi grundige og gode svar. Eg vil ha fram i lyset kva som har skjedd, og om systemet for utanlandsadopsjon har vore forsvarleg, sig barne- og familieminister Kjersti Toppe (Sp) i regjeringa si eiga pressemelding om utvalet.
Det overordna føremålet med granskinga er å få svar på om det har vore ulovlege eller uetiske forhold i samband med utanlandsadopsjonar til Noreg.
– Det er eit utruleg spennande og viktig oppdrag å få vere med å løyse, seier NIBR-forskar Anne B. Staver.
Ho er statsvitar, med doktorgrad frå University of Toronto innanfor samanliknande offentleg politikk. Doktorgrada hennar undersøkte utviklinga av strengare reglar for familieinnvandring i Danmark, Noreg og Storbritannia.
Stavar forskar på inntektskrav i innvandrings- og integreringspolitikken frå 1980-talet og framover, og dessutan europeisk asylpolitikk og mottak av flyktningar, og underviser i internasjonal migrasjon og migrasjonspolitikk.
By- og regionsforskingsinstituttet NIBR ved OsloMet har også forska på utanlandsadopterte – sist om erfaringane deira med diskriminering og rasisme.
I rapporten frå 2021 kom det fram at halvparten av utanlandsadopterte i Noreg har opplevd forskjellsbehandling på grunn av utsjånad eller adoptivbakgrunn (oda.oslomet.no), og at rasisme, diskriminering og forskjellsbehandling mot utanlandsadopterte er utbreidd i Noreg, særleg på jobb, skule og i offentlege rom.
