Akershus fylke ligg på Austlandet og omkransar hovudstaden Oslo. Akershus hadde 728 803 innbyggarar per 1. januar 2025, fordelt på 21 kommunar. I folketal er Bærum kommune den største med ca. 130 000 innbyggarar, og Hurdal den minste med ca. 3 000 innbyggarar.
Fylket har eit variert næringsliv med sterk og moderne industri innan blant anna teknologi, høgteknologi, forsvars- og romfartsindustri, logistikk, produksjon og næringsmiddelindustri.
Område som Kjeller, Lillestrøm, Jessheim, Asker og Bærum har mange industribedrifter, forskingsmiljø og teknologiklynger, ofte i tett samarbeid med kunnskapsmiljø som NMBU og forskingsinstitutt. Akershus har også mange små og mellomstore bedrifter.
Fylket er også eit viktig utdanningsområde med mange grunnskolar, vidaregående skolar og høgskolemiljø. Akershus har høgre utdanning blant anna gjennom Norges miljø- og biovitenskapelige universitet (NMBU) i Ås, som er kjend for sine studium innan miljø, biovitskap og teknologi. I tillegg har OsloMet campus på Kjeller i Akershus, og tilbyr utdanningar innan blant anna helse- og samfunnsfag - som gir mange moglegheiter for studentar i regionen. På Lillestrøm har Gardermoakademiet nyleg etablert seg, og tilbyr høgare utdanning innan helsefag, logistikk, arbeidsleiing og reiseliv.
Akershus har god infrastruktur og kollektivtransport, noko som gjer det attraktivt for både bedrifter og innbyggarar. I tillegg byr fylket på variert natur med djupe skogar, innsjøar og kystline langs Oslofjorden.
Samarbeid med OsloMet
OsloMet er ein svært viktig samarbeidsaktør for opplæringsområdet i Akershus fylkeskommune. Akershus er eit fylke i vekst, og eit tett samarbeid med universiteta er nyttig for å både kunne møte utfordringane og gripe moglegheitene vi veit kjem. Saman vil fylkeskommunen og universitetet halde fana høgt for å få fleire av innbyggarane våre til å velje profesjonsutdanningar.
Samarbeidet mellom Akershus og OsloMet har foregått lenge, blant anna på området som lærarutdannar og i vidareutvikling innanfor pedagogikk og didaktikk. Det langvarige samarbeidet har også resultert i vellykka prosjekt som til dømes LUSY-prosjektet Lærarutdanningsskolar i yrkesfaglærarutdanninga (LUSY) - OsloMet. Vårt felles mål er å saman sikre at lærarane i Akershusskolen kan gi den best moglege opplæringa for våre elevar, ved å vere både fagleg og pedagogisk oppdaterte i tråd med ny forsking og kunnskap.
