Noregs forskingsråd har delt ut til saman 277 millionar til 16 prosjekt innan helseforsking og helseinnovasjon (forskningsrader.no). OsloMet har fått tilsegn på to prosjekt, som begge blir leidde av professor Marit Haldar ved Institutt for sosialfag.
Prosjektet «Berekraftig radikal oppgåvedeling i helse og omsorgssektoren» leiar Haldar saman med professor Erik B. Rasmussen. Prosjektet har fått 21,5 millionar kroner.
Målet er å utvikle ein ny oppgåvebasert velferdsmodell som bidrar både til betre ressursutnytting på tvers av kommunale helsetenester, og samtidig involvere frivillig sektor og personar utanfor ordinært arbeidsliv i større grad.
Les om Haldar sitt andre prosjekt, «SAFE@HOME: Technologies of care for aging migrants».
Ei radikal omstilling
– Kommunane står i ein krevjande situasjon med mange kriser samtidig. Dei må levere lovpålagde tenester, men har svært ulik økonomi. I mange år har Kommune-Noreg derfor snakka om behovet for ei radikal omstilling, og mange er allereie i gang, forklarer Haldar.
Kombinasjonen av ei aldrande befolkning, sosial og økonomisk utanforskap og stadig strammarar økonomiske rammer truar berekrafta i dei offentlege velferdstenestene. Det gjer det nødvendig å finne nye måtar å organisere og levere tenester på.
Prosjektleiar Marit Haldar Foto: Sonja Balci / OsloMet
Skal gjere det lettare å bidra
I helse- og omsorgstenestene handlar omstillinga om å frigjere og utnytte dei tilsettes tid betre.
– Helsetenestene manglar hender og ressursar. Sjukepleiarar gjer i dag mange oppgåver som fint kan løysast av andre, slik at dei sjølv kan konsentrere seg om faktisk sjukepleiararbeid, seier Haldar.
Samtidig er det mange menneske som står utanfor arbeidslivet – og som kan og ønsker å jobbe.
– Dei er del av ein stor utanforskap, og denne omstillinga skal gjere det lettare for dei å bidra. Ei slik radikal oppgåvedeling i helse- og omsorgstenestene gir dermed store samfunnsgevinstar på fleire måtar.
Lærer av utfordringane
Forskarane skal følgjeforske dette omstillingsarbeidet i nokre kommunar.
– Vi skal hjelpe til i planlegginga og implementeringa i samarbeidskommunane våre, og samtidig lære av utfordringane som oppstår undervegs. Slik kan vi på sikt også hjelpe andre kommunar med å lykkast med ei krevjande, men viktig endring.
Prosjektet skal gjennomførast i samarbeid med Lillestrøm kommune, Nordre Follo kommune, Bydel St. Hanshaugen i Oslo, Universitetet i Søraust-Noreg, Roskilde universitet og Örebro universitet.
