Norske myndigheiter ønsker å bidra til ukrainsk motstandskraft og gjenreising, samtidig som dei vil auke Ukraina-kompetansen i norsk politikk, forvaltning og næringsliv.
Til det trengst kunnskap, og Direktoratet for høgare utdanning og kompetanse (HK-dir) deler derfor ut midlar til forsking som bidrar til å utvikle og styrke samfunnsrelevant kompetanse om Ukraina i Noreg.
By- og regionforskingsinstituttet NIBR ved OsloMet får no støtte til tre store prosjekt om høvesvis arbeidsliv, kommunesamarbeid og forskarnettverk.
Kunnskap om ukrainsk arbeidsliv
– Dette prosjektet gleder eg meg spesielt mykje til å ta fatt på. Temaet er hyperviktig og relevansen er stor. Prosjektet tar sikte på å hjelpe dei mange solidaritetsinitiativa norsk fagrørsle har overfor Ukraina, og gjere dei endå meir treffsikre, seier NIBR-forskar Jørn Holm-Hansen.
Han skal leie prosjektet «Arbeidsliv i Ukraina», som skal kople forskingsbasert innsikt om ukrainsk arbeidsliv med behov for kunnskap norsk fagrørsle, forvaltning og næringsliv har.
– Det blir nybrotsarbeid. Endringar skjer fort på dette området og det finst lite kunnskap om ukrainsk arbeidsliv og fagorganisering, også blant oss forskarar som jobbar med Ukraina, seier Holm-Hansen, og legg til:
– Gjennom prosjektet kjem vi til å skaffe den kunnskapen. Og vi kjem til å oppdatere han fortløpande.
Blant anna skal prosjektet lansere ein ny nettstad for arbeidslivsrelevante endringar i Ukraina.
Holm-Hansen meiner forholda i det ukrainske arbeidslivet er eit viktig tema.
– Aller viktigast er det sjølvsagt for dei som står i jobb i Ukraina, men den ukrainske økonomien er også avhengig av at nokre av dei mange millionane med arbeidsutvandrarar og flyktningar vender heim. Dessutan er det ein stor jobb å gjere før dei ukrainske arbeidslivsoppgåvene er oppe på EU-nivå, og EU-tilpassing har høg prioritet i landet no, seier Holm-Hansen.
Kunnskap om ukrainsk lokalstyre
Det andre NIBR-prosjektet, «Kunnskapsprogram om Ukraina for norske kommunar», skal gi kommunane eit solid grunnlag for å etablere og vidareutvikle berekraftige partnarskap med kommunar i Ukraina.
– Satsinga er viktig for å styrke lokalt gjenoppbyggingssamarbeid og sikre målretta, kunnskapsbasert støtte til Ukraina, seier prosjektleiar Aadne Aasland.
Prosjektet skal særleg bidra med kunnskap om korleis lokalstyre fungerer i Ukraina, og forskarane samarbeider med blant anna KS, Kyiv School of Economics og Association of Ukrainian Cities.
– Norske kommunar viser stor vilje til å bidra til gjenreisinga av Ukraina, men manglar ofte eit godt kunnskapsgrunnlag. Vi skal levere innsikt som gjer partnarskapa meir målretta og robuste, seier Aasland.
Det tredje prosjektet NIBR har fått støtte til, er ei vidareføring av UKRAINETT, eit nettverk for forskarar med interesse for Ukraina, som NIBR tok initiativ til å starte då Russland gjekk til storangrep i 2022.
Prosjektet skal bidra med konferansar, seminar, såkornmidlar og formidling til både forskarar, forvaltning og allmenta. Prosjektleiar er NIBR-forskar Marthe H. Myhre.
Styrkar viktig samarbeid
NIBR har forska på, i og med Ukraina og ukrainarar sidan 2008, og har brei kompetanse på mellom anna politiske reformer, lokaldemokrati, kommunal tenesteyting, språk og identitet i ulike delar av landet.
Forskingssjef for dei tre forskarane, Kristian Rose Tronstad, meiner det derfor er svært gledeleg at nettopp NIBR har fått prosjekta.
– Dei gjer det mogleg å føre vidare og styrke det viktige samarbeidet vårt med sterke fagmiljø og organisasjonar i landet. Gjennom prosjekta skal vi levere eit nødvendig kunnskapsgrunnlag for Noregs langsiktige engasjement i og med Ukraina, seier Tronstad.
