Dette forskingsprosjektet skal undersøke utvandring frå Noreg blant etterkommarar av innvandrarar.
Temaet blei aktualisert våren 2025 då Rima Iraki, samfunnsredaktør i Romerikes Blad, starta ein diskusjon om «eliteinnvandrarar» som flyttar frå Noreg. Ho beskreiv unge vaksne som er fødde og oppvaksne i Noreg med foreldre frå andre land, som har høg utdanning, og som vurderer å flytte til heimlandet til foreldra eller eit land i nærområdet. Debatten skapte stort engasjement, både blant etterkommarar og andre.
Mens det er mykje forsking på innvandring, veit vi mykje mindre om utvandring – og særleg blant etterkommarar. Kven er etterkommarar som flyttar frå Noreg, kvifor flyttar dei, og kor drar dei? Blir dei i utlandet, eller kjem dei tilbake til Noreg? Vi skal gi nokre første svar på desse spørsmåla med ein kombinasjon av registerdatanalyser og intervju.
