Studievalet som opna dører

Etter fleire år i filmbransjen, der han jobba med visuelle effektar som VFX-artist, fann han tilbake til interessa si for informasjonsteknologi (IT). Dette leidde han til OsloMet og bachelorstudiet i informasjonsteknologi – eit val som skulle vise seg å vere heilt rett for han.  

God balanse mellom teori og praksis

Jørgen kjem frå Førde, og budde alt i Oslo då han bestemte seg for å starte på bachelorstudiet i informasjonsteknologi. Å velje studium var derimot ikkje heilt enkelt:

– Eg hadde inga høgare utdanning frå før og visste ikkje heilt kva eg skulle velje. Eg visste berre at eg likte IT då eg hadde det som valfag på vidaregåande, og eg syntest det var gøy. Då eg skulle starte på nytt, tenkte eg tilbake på det, og bestemte meg for å ta ein bachelor i IT.

 Å finne rett studium og universitet var utfordrande, spesielt når det var nesten ti år sidan han gjekk ut av vidaregåande.

– Det var mykje å velje mellom, og eg fekk ikkje den same oppfølginga med rettleiing som dei som kjem rett frå vidaregåande. Men OsloMet såg ut til å ha den rette balansen mellom teori og praktisk læring, noko som var viktig for meg, fortel han.  

Engasjement og kreativitet er viktig

Jørgen meiner at engasjement og kreativitet er nøkkelen til å lukkast som IT-student:

– Ta det du lærer på studiet, og gjer det til noko eige. Bruk oppgåvene som eit utgangspunkt, men du bør utfordre deg sjølv til å lage noko nytt. Det viser at du har driv og interesse, og det kan vere det som skil deg ut når du søkjer jobb.

Han kjem tilbake til kor viktig nettverk er i jobbsøking og orientering mot arbeidslivet:

– Bli med i studentorganisasjonar, ta på deg verv, og bygg eit nettverk. Det er ofte kontakten med folk som kan føre deg til ein jobb.

Jørgen følte seg aldri som ein junior då han tok til i konsulentselskapet Bekk etter bachlorstudiet i informasjonsteknologi. Foto: Olav-Johan Øye

Framtida i IT-bransjen

I dag jobbar Jørgen som konsulent hos Bekk, der han har fått vere med på alt frå probono-prosjekt til reelle oppdrag for Statens vegvesen. Han trekkjer fram kor støttande arbeidsmiljøet er, og kor mykje han har lært på kort tid.

– Eg følte meg aldri som ein junior her. Vi blir oppmuntra til å prøve oss fram, gjere feil og lære av dei. Det er utruleg utviklande, seier han.

På spørsmål om framtidsplanar, er Jørgen open for både spesialisering og vidareutdanning:

Han ser føre seg at det kan vere mogeleg for han å fordjupe seg i eit spesifikt fagområde innan IT, og vurderer kanskje å ta ei masterutdanning, dersom det kan bidra til vidare karriereutvikling. Men no ønskjer han å byggje erfaring og styrke kompetansen gjennom praktisk arbeid.

– Eg håpar at historia mi kan inspirere andre til å finne gleda i det dei studerer og tore å utfordre seg sjølv. IT er ein bransje med uendelege moglegheiter, spesielt for dei som brenn for faget sitt, seier han, og legg til at mogelegheitene vert endå betre med noko erfaring.

Med ein fot godt planta i IT-bransjen og eit hjarte for samfunnsnyttige prosjekt, ser Jørgen lyst på framtida. Historia hans viser kor viktig det er å vere aktiv, byggje nettverk og bruke studietida til å utvikle seg både fagleg og personleg.

– Og viss du synest det er gøy å programmere og utvikle, eller designe eller jobbe med noko anna fagfelt innanfor det, er det plass til deg i bransjen, trur eg.