– Det å sjå gleda hos ein pasient og få høyre at eg har gjort noko sitt liv betre, er ein god og spesiell følelse, seier ortopediingeniør Lisa Helen Jordbrudal, som oppdaga studiet ved ein tilfeldigheit.
Ho hadde sett på både ingeniørfag og helsefag. Men då ho oppdaga ortopediingeniørstudiet, var det midt i blinken.
– Det var akkurat det eg hadde lyst til. Ingeniør og helsefag i eitt. Jeg er kjempenøgd med studiet.
Ho poengterer at du må like å jobbe med menneske, vere interessert i å forstå kroppen og anatomien, og interessere deg for biomekanikk.
– Ingen kvardagar er like. Det er mi oppgåve å finne ut kva slags hjelpemiddel og design som passar pasienten. Som regel jobbar ein teknikar med sjølve produksjonen. Vi finjusterer og sørger for at bioteknikken stemmer overens med pasienten.
Rett ut i jobb
Lisa byrja i 2013 og vart uteksaminert i 2016. Ho gjekk rett inn i turnus etter studiet og jobbar no som turnuskandidat i Blatchford-Ortopedi i Kristiansand. Ho er opptatt av at det er eit viktig studium.
– Berre tenk på alle spesialtilpassa hjelpemiddel som lagast ved ortopediske bedrifter. Vi hjelper alt frå barn med CP til amputerte, der revmatikarar og diabetikarar står for den største andelen av amputasjonar i Norge.
Det er så mykje som kan gjerast. Det er ubeskriveleg å gi eit barn eit hjelpemiddel og sjå livsgleden når dei kan sparke ein ball for første gang. Eg gløymer aldri den første pasienten eg hadde.– Lisa Helen Jordbrudal
Som ortopediingeniør er det store moglegheiter for å jobbe utanlands.
– Det er ein ettertrakta utdanning, og du blir ikkje arbeidslaus. Du er med på å betre livskvaliteten for så mange. For dei som mangler eit ben kan ei protese utgjere heile forskjellen.
– For ein som manglar ei hand kan kanskje ein krok vere det som forenklar kvardagen, medan andre treng ei biomekanisk hand til å utføre fleire oppgåver.
– Det var ein protesepasient med mange problemstillingar. Å sjå han gå igjen og sjå at det funka etter mange timar med justeringar og innstillingar, det var stort.
– Dette er ein drøymejobb, og eg gler meg kvar dag til å gå på jobb. Dette studiet har betydd alt. Det har skapt kvardagen min, seier Lisa.
