Ny teknologi og innovasjon gir moglegheiter for framtidas byar
– Mest spanande er ny teknologi og nye idear. Det er mykje diskusjon om berekraft, og bruk av ny teknologi og innovasjon i transportløysingar og i det menneskeskapte miljøet i ein by, sier Asim.
– Vi føler vi får vere med på å forme framtida. Sjå nærare på korleis byar vil kunne sjå ut, og korleis vi kan bevege oss rundt i dei, seier Markus.
– Vi ser av dei selskapa som jobbar med dette, korleis dei har endra på ting, og modellert løysingar ved å bruke dei same digitale verktøya som vi lærer å bruke, vi som skal bli spesialistar på planlegging av berekraftige byar med smarte transportløysingar, seier Asim.
– Ut i frå det gjesteførelesarane fortel oss, trur eg at vi vil ha mange moglegheiter i arbeidslivet, seier Amna.
Markus (frå venstre), Asim og Amna ser nærare på korleis byar kan sjå ut med nye løysingar for mobilitet, transport og areal. Foto: Olav-Johan Øye
Byggingeniørfag, landskapsplanlegging og bygningsarkitektur la grunnlaget
Studentane har litt forskjellig fagleg bakgrunn frå bachelorstudie, men alle har tatt utdanning som gjorde dette masterstudiet aktuelt.
– Eg var interessert i transportingeniørfag, og ville lære meir om byplanlegging. Eg hadde alt ein bachelorgrad i byggingeniørfag, og ville ha spesialisering i transportplanlegging og byplanlegging, seier Asim.
– Eg kjem frå den andre sida av spekteret, og hadde studert landskapsplanlegging på eit ganske detaljert nivå, men eg innsåg at eg kanskje ville gjere det betre om eg zooma litt ut og jobba med byplanlegging i ein litt større skala, seier Markus som har studert på Høgskulen på Vestlandet (HVL).
– Eg tok bachelor i bygningsarkitektur-ingeniørfag frå Pakistan, og blei anbefalt å ta ein skandinavisk grad for å få betre jobb- og karrieremoglegheiter. Eg har familie her, og kunne ikkje søke meg ut av Oslo, seier Amna.
På dette feltet er det ein stor fordel å ha ein mastergrad når du skal jobbe i Skandinavia, spesielt om du vil jobbe i dei store byane, meiner studentane.
– Då eg søkte jobb, ønskte dei meir spesialisering i prosjekt. Og det er også ein viktig grunn til at eg valde dette masterprogrammet på OsloMet. Eg ville ha denne kompetansen, og gjerne studere i sentrum av Oslo, seier Asim.
Eit godt val av masterstudium
– Vil de råde andre til å ta dette masterstudiet?
– Ja, sjølvsagt. For oss er det ei litt spesiell reise å vere dei første studentane, sier Markus.
– Med tanke på arbeidsmarknaden, er det eit godt val, særleg om du vil vite meir om korleis mobilitet kan planleggast på ein smart måte i ein by, og korleis politiske avgjerder kan påverke korleis vi kan bevege oss i byen, seier Markus.
– Ut frå det vi veit no, og det vi har fått høyre frå arbeidslivet, vil vi tilrå studiet til andre, seier Asim.
