I ein ny AFI-rapport som Hans Christoffer Aargaard Terjesen har skrive på oppdrag frå Kunnskapssenter for lengre arbeidsliv, tek han føre seg korleis leiingsteori kan brukast til å forstå og utvikle meir aldersvennleg leiing. Rapporten heiter «Frå kvifor til korleis: Aldersbevisst leiing – kva inneber det?».
– Det finst mykje forsking om eldre arbeidstakarar, men det er få studiar som koplar temaet til leiingsteori, seier forskar Hans Christoffer Aargaard Terjesen ved Arbeidsforskningsinstituttet AFI. – Det finst heller ikkje etablerte leiingsmodellar som tek utgangspunkt i den eldre arbeidsstyrken.
Det har han prøvd å gjere noko med.
AFI-forskar Hans Christoffer Aargaard Terjesen har skrive ein ny rapport om aldersvennleg leiing. Foto: Eivind Røhne / AFI – OsloMet
For å ta oss frå «kvifor» til «korleis», presenterar Terjesen ein ny modell for prototypeleiing som leiarar kan nytte i sitt arbeid for å fremje eit meir aldersvennleg arbeidsliv.
– Eg ville utfordre klassisk leiingsteori, seier Terjesen. – Eg meiner det er eit stort behov for leiingsmodellar som er mindre opptekne av leiarane sjølve og meir opptekne av medarbeidarane, av «vi-prosjektet» på arbeidsplassen og ikkje minst av dei eldre arbeidstakarane sine framtidsprosjekt og korleis ein kan sikre at dei har det kjekt på jobben, slik at dei blir verande.
Han ser òg på kor viktig det er med auka samarbeid mellom forsking og praksis for å bygge framtidas arbeidsliv der folk vel å stå så lenge som mogleg i jobb.
– Eg meiner denne rapporten bør vere interessant for leiarar, HR-ansvarlege, dei som arbeider med arbeids- og velferdsorganisering på politisk nivå, og sjølvsagt alle som har ei forskingsinteresse innanfor leiingsteori og aldersvennleg arbeidsliv, seier AFI-forskaren.
Referanse
Hans Christoffer Aargaard Terjesen (2025) Fra hvorfor til hvordan: Aldersbevisst ledelse – hva innebærer det? (nva.sikt.no) AFI-rapport 2025:07
