Praksisutveksling
Maja studerer til å bli grunnskolelærar med spesialpedagogikk som fordjupingsemne i sjette semester. og Ønsket om å få andre erfaringar enn det ein vil få i ein norsk kontekst, var noko av det som motiverte for praksisutveksling i Nepal.
– Det som motiverte meg til å dra på praksisutveksling var eit ønske om å oppleve noko nytt, ein litt annan studiekvardag og å gjere noko ein ikkje får moglegheit til så mange gonger i livet, fortel Maja.
Nepal
Valet stod mellom India, Sør-Afrika og Nepal. Maja landa til slutt på Nepal, fordi dette var eit land ho viste lite om.
– Eg hadde høyrd frå ein kollega at det er eit veldig gjestmildt land, i tillegg blei naturen trekt fram som å vere heilt fantastisk. Gjestmildskapen og den fantastiske naturen blei det også tid til å få erfaring med, seier ho.
Å møte så mange flotte menneske og få nye vener som studerer det same var noko av det beste med utvekslinga, fortel Maja. Nokon av dei store høgdepunkta i utvekslingsperioden var alle turane rundt i Nepal ho fekk oppleve saman med dei nye venane.
lunsjpause på tur frå Nagarkot til Dhulikhel Foto: Katrine Rimstad
Erfaringar for framtida
Noko av det Maja fekk ut av praksisutvekslinga var å få øve sjølvstende og tilpassingsevne som framtidig lærar.
– Det handla om å tilpasse seg ein ny kvardag og legge til side korleis ein er vane med å ha det. I klasserommet må ein ofte ta ting på sparket, og eg kjenner utvekslinga har gjort meg meir rusta som lærar og mykje tryggare i rolla, fortel Maja.
Skolen Maja har hatt praksisutveksling til har om lag 50 elever med nedsett syn. Elevane kjem til denne skolen frå ulike område i Nepal. Ein av erfaringane ho tek med seg herifrå er korleis ein kan følge opp elevane med synshemming utan særleg høyrselsteknisk støtteutstyr.
– Det å få praksiserfaring på ein skole i Nepal har gitt meg opplevingar og erfaringar som kjem til å komme godt med når eg skal ut i arbeidslivet i Noreg.
Ei unik oppleving
For Maja var det ei unik oppleving å utøve lærarrolla i Nepal, samanlikna med praksiserfaringane hennar i Noreg. Ho meiner praksisutvekslinga er noko meir enn å få innsikt i eit anna skolesystem.
– Det har gitt meg veldig gode vennar og minner eg seint vil gløyme. Opphaldet i Nepal har ikkje berre vore ei fagleg utviklingsreise, men også ei personleg reise som har gitt mange inntrykk og nye perspektiv på profesjonsutøvelse, fortel ho.
